Yeniavaz.com açıqlanan rəsmi məlumatlara istinadən xəbər verir ki, Dağlıq Şirvan iqtisadi rayonunda bir nəfərin ay ərzində siqaret üçün sərf etdiyi vəsait orta hesabla 14,3 manata bərabərdir. Bu məbləğ adambaşına düşən orta aylıq istehlak xərclərinin 4,1%-ni təşkil edir. Bu, həmçinin sözügedən rayonlarda təhsilə çəkilən xərclərdən təxminən 2 dəfə çoxdur. Belə ki, Dağlıq Şirvan iqtisadi rayonunda yaşayan insanların adambaşına düşən aylıq təhsil xərci 8,2 manatdır ki, bu da ümumi istehlak xərclərinin 2,4%-nə bərabərdir.

Ay ərzində siqaretə ən az vəsait xərcləyənlər Abşeron-Xızı iqtisadi rayonunda yaşyanlardır. Abşeron-Xızı iqtisadi rayonunda (Sumqayıt şəhəri, Abşeron və Xızı rayonları) ay ərzində adambaşına siqaretə xərclənən orta aylıq məbləğ cəmi 1,3 manat təşkil edir.

Bu göstərici, Bakı şəhərində 6,7 manata, Naxçıvan Muxtar Respublikasında 6,2 manata, Lənkəran-Astara iqtisadi rayonunda 5 manata, Mərkəzi Aran iqtisadi rayonunda 9,7 manata, Gəncə-Daşkəsən iqtisadi rayonunda 10,4 manata, Şəki-Zaqatalada 9,2 manata, Şərqi Zəngəzur və Qarabağ iqtisadi rayonlarında 6,9 manata, Qazax-Tovuz iqtisadi rayonunda 5,8 manata, Mil-Muğan iqtisadi rayonunda 5,9 manata, Quba-Xaçmaz iqtisadi rayonunda 7 manata, Şirvan-Salyan iqtisadi rayonunda isə 5,5 manata bərabərdir.